2024 上旬

* 許善賣旗日結果公布及精華短片💝 *

2024.6

今次賣旗活動線上線下, 籌得超過HK$300,000, 扣除必要支出, 依然超過香港分區賣旗日淨收入目標 🎯HKD220,000！

必須要讚揚義工們的愛心及不辭勞苦的付出🙏🥰。最感謝的當然係廣大善長在線上線下積極捐款。

會計師核數工作已在進行中, 許善將會按照申請賣旗之承諾, 把善款用在以下兩大項目：
- 非物質文化遺產推廣
- 福袋派發予基層家庭

而家一齊嚟睇下今次活動嘅精華短片啦🎥

* 畢業喇🎓「我要做導師」計劃 - 中國書法班 *

2024.6.26

經過四個多月嘅學習📚，由輝哥主理嘅第一期中國書法班早前舉行咗畢業禮，共有6位義工正式畢業，恭喜劉理正、丘超美、張麗霞、黃可儀、鄧佩珊及陳燕筠。🥳🎉

畢業禮當日，大家展示咗自己嘅書法作品😍，每一幅都充滿心血同努力💧。輝哥亦喺現場逐一指導🧐，畀咗好多寶貴嘅建議。佢對大家嘅進步感到非常欣慰，並鼓勵大家繼續努力，唔好停下來。

畢業之後，呢6位義工將會跟隨「許善」出去教中小學生書法，將自己嘅知識同技藝傳授畀下一代。書法作為中國非物質文化遺產之一，不單止係溝通嘅工具，仲包含豐富嘅藝術元素，係中國傳統文化嘅重要部分，展現咗我國藝術文化底蘊。保存同傳播呢種文化遺產係非常重要嘅責任🧐，希望各位義工能夠繼續為此貢獻力量。💪

學習過程中，大家都非常認真，不單止要上堂喺現場接受輝哥嘅指導👨‍🏫，回家仲要做功課。同學們一筆一劃，勤奮練習，終於學有所成，書法水平大大提升🆙。雖然呢個係畢業禮，但其實唔係學習嘅終結，而係一個新嘅開始。輝哥會繼續幫助大家進一步提升書法水平📈，持續學習同進步。

特別要感謝輝哥嘅悉心教導❤️，佢唔單止唔收費，仲傾囊相授，毫不保留。另外，提供場地嘅Susan亦係今次計劃成功嘅關鍵元素之一。「許善」喺此衷心感謝兩位嘅支持。🫶

今次嘅書法班唔單止係一個學習平台，仲建立咗一個互相支持、共同進步嘅小組🥰。大家喺學習過程中結下咗深厚嘅友誼，互相鼓勵💪，共同成長。未來，佢哋會繼續一齊喺書法嘅道路上前行，並且致力於傳承同弘揚中國非物質文化遺產。🤩

* 「許善」屏山義工同樂考察日🚌☀️ *

2024.6.15

每年「許善」都會舉辦最少一次「義工同樂日」🎉，目的係答謝一班義工嘅付出之外🙏，亦係讓義工一齊考察下嚟緊準備有機會舉行中華非遺文化活動嘅地點。今年我哋決定去屏山文物徑導賞團，之後喺屏山鄧氏祠堂食盆菜九大簋。🤩今次活動共有60位義工及其家人參與。

元朗屏山是香港歷史最悠久的地區之一，喺義務導賞員的帶領下📢，大家漫步屏山文物徑，了解屏山的歷史。文物徑貫連多幢典型中國傳統建築，可領略新界的傳統面貌及宗族生活📷

行完文物徑之後我哋就去到鄧氏祠堂食午飯🍽️，鄧氏係新界其中一個重要的宗族，可以係佢哋祠堂食飯真係一個好難得的體驗🤩。盆菜九大簋係本地農家菜最具特色的傳統之一，香港現在只有元朗屏山鄧氏後人做九大簋，唔少義工都係第一次食傳統九大簋，個個都食到舐舐脷😋，一起渡過咗輕鬆愉快嘅一日。🥰

「許善」今次可以安排到一個咁特別嘅體驗俾大家，必須要鳴謝以下幾位人士嘅協助🙏：首先要多謝屏山鄉事會主席鄧同發先生及資深元朗屏山區議員鄧慶業先生🙏🫰。之後要感謝鄧慶業議員兼仕義務導賞員及另一位義務導賞員鄧學華先生嘅熱心協助🫶。另外亦要特別感謝「許善」鐵腳義工Michael同佢識咗十幾年嘅屏山原居民好朋友鄧炳華先生(華哥)及太太(華嫂)💞，喺兩位穿針引線之下🪡🧵，讓「許善」認識到鄧主席及鄧議員，令我咃有幸舉辦今次活動。

本次活動費用由「許善」創辦人私人贊助，沒有動用「許善」善款一分一毫。

* 中國非遺親子日 *

2024.6.8

除咗賣旗活動之外，當日下午我哋亦為派出咗100名學生及家長幫手賣旗嘅「世界龍岡學校黃耀南小學」舉辦咗一個中國非遺體驗活動。

同學仔做善事幫手賣旗之後，一齊享用點心午餐。午宴期間，「許善」義工示範及講解兩款中華文化手作 - 剪紙✂️&串珠繩🧶，同學仔更急不及待即場親自試試👍 ！

同學仔精力充沛，午宴之後再去香港公園玩，個個仍然扎扎跳！🏃‍♀️🏃‍♂️

午宴及體驗活動全費由「許善」創辦人私人贊助，冇用到善款一分一毫㗎！

* 許善賣旗日💝 2024 年 *

2024.6.8

籌備超過一年⏰，「許善」嘅第一次賣旗活動上個星期六已經順利完成！🥳🎉 當日天公造美！準時八點出太陽🥰

當日我哋大約400名許善義工遍佈全個港島區唔同地方賣旗，不論喺銅鑼灣、中環、金鐘、銅鑼灣、北角每個角落都有許善大小義工嘅蹤影😎。唔少義工仲火速已經將手上嘅旗賣哂，要去站頭補貨再出擊！💪🏼😝

部份過往許善曾經服務過嘅的團體同學校都有派代表幫手賣旗，用行動回報許善。

其中聖雅各福群會蘇屋中心嘅一班長者義工個個一早就精神奕奕到場撐「許善」，令我哋一班許善管理層非常感動💪🥰！

💖 另外許善曾山長水遠入去梅窩小學做慈善工作坊。今次梅窩小學一班學生同老師亦專登搭船出嚟幫手賣旗撐我哋。🚢

許善曾經喺世界龍岡黃耀南小學舉辦中華同樂日。今次佢哋亦派出100名小學生及家長參與賣旗。👏

今次賣旗空前成功，好多謝各位出錢又出力嘅許善賣旗義工及做站長嘅許善之友！ 🙏🙏🙏❤️有你們真好😊！

特別鳴謝兩位賣旗籌委委員Ms Susanna Wong & Ms J Lam, 同幫我哋設計靚靚旗子Ms Evelyn Teng。

當然最後仲要多謝所有買咗旗嘅市民啦！🫶

* 「許善」生日助人計劃🎂 2024年6月生日之星✨ *

2024.6

感謝以下9位6月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐Jason Yang ⭐Amanda Ng ⭐Blackmore Chan
⭐Lesley Lam ⭐Joe Leung ⭐Rimsky Yuen
⭐Fanice Lui ⭐Scarlett Pong ⭐Roden Tong

* 變臉表演及分享會🎭@善一堂逸東幼稚園 *

2024.5.24

今次「許善」第一次去位於📍大嶼山嘅「善一堂逸東幼稚園」舉行工作坊。本來有啲擔心幼稚園小朋友咁細個會未必識欣賞呢個國粹。結果喜出望外！經過義工深入淺出嘅介紹同講解👩‍🏫，在場約300個小朋友都好期望睇表演。表演確實係精彩絕倫🤩，全場反應熱烈🔥，班小朋友拍手拍到手軟。睇完表演之後，到互動環節，個個都非常踴躍🙌，希望爭取上台體驗變臉。

認識「非遺文化」和學習其他知識一樣📖，從細細個就可以開始種下種子、培養根基。

感謝校方的邀請及長途跋涉都協助活動完成嘅義工。有你哋嘅付出今次先可以令到在場幾百個小朋友咁細個就有機會接觸中國非物質文化遺產，同時亦為佢哋帶來一個愉快嘅童年回憶。🙏

* 獨居長者探訪活動💕 *

2024.5

「許善」再次參與聖雅各福群會的「長者家居安全綜合計劃」，今次一樣係兵分兩路↔️去到新界及九龍區。夏天即將來臨🥵，今次探訪除咗心靈上「送暖」，亦實體上「送涼」🌬️🎐，送上及組裝風扇，當然仲有「許善」迎夏福袋🧧。今次遇上有些長者剛搬入新居，小家電同福袋內容真係好啱長者。

我哋啲義工好細心，有部份長者唔識英文，義工主動喺產品上邊寫字同埋畫圖以表示產品嘅用途。

感謝聖雅各福群會的安排及家電🙏，當然亦感謝我哋班愛心義工的協助🫰。

* 迎夏福袋包裝日🌞🧧 *

2024.5

一呼百應，「許善」義工又再次齊集包裝800份迎夏福袋😎。福袋內容豐富，包括餅乾🍪、麵食🍜、湯包🍲、粟米湯🌽，個人護理產品(牙膏🦷、洗頭水🧼、護髮露及潤膚露等等)，而且仲有小義工即埸做嘅中國吉祥結🫶。今次福袋將會隨5月中「許善」探訪老人活動中送出，同埋喺6月8號「許善」港島區賣旗日送比參與嘅長者義工，以感謝佢哋幫手。

感謝贊助商加多寶集團、士多、嘉頓及壽核牌的支持及義工們的幫忙。🙏

* 雞蛋仔工作坊🥚@伊利沙伯中學舊生會小學分校(天水圍)*

2024.5

距離上次足足一年⏰，終於再次返黎伊利沙伯中學舊生會小學分校(天水圍)舉行雞蛋仔工作坊🥚。雞蛋仔製作方法簡單👨‍🍳👩‍🍳，焗完出黎又香噴噴👃，仲可以即時享受熱辣辣嘅成果添😋，一直以黎都係「許善」最受大人小朋友歡迎的工作坊之一🔥。

感謝校方再次邀請及「許善」義工們的協助🙏

* 「許善」生日助人計劃🎂 2024年5月生日之星✨ *

2024.5

感謝以下14位5月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐Benjamin Choi ⭐Sylvia Lau ⭐Hui Pui Wing
⭐Yvette Chan ⭐Hugo Wong ⭐Natalie Lau
⭐Anson Tam ⭐Barry Leung ⭐Kevin Leung
⭐Iris Leung ⭐Ida Li ⭐Kevin So
⭐Danielle Shek ⭐Michael Tse

* 「許善」安排南區中學生義工探訪活動第5️⃣回
上善素餐廳派飯派福袋活動*

2024.4

同學仔要落手落腳幫忙𢳂飯🥄🍚同埋入福袋。

門前早早就大排長龍，同學動作要快之外仲要企理，派完飯仲要記得比埋福袋老街坊。面對一心幾用的情況，同學仔表現都十分出色💯，任務順利完成之餘仲有時間同受惠者傾幾句添。👍

活動之前一晚見到黃色暴雨🌧️，一直擔心早上來排隊的老友記😟。好在最後天公做美☀️，派完10分鐘先開始落雨。感謝老天爺眷顧排隊嘅公公婆婆🙏🏻

今次活動要特別感謝善長Susan Chu無私捐出部份福袋的物資。🙏

* 「許善」安排南區中學生義工探訪活動第4️⃣回
深水埗露宿者派飯活動*

2024.4

係「許善」和社區組織帶領下，幾位同學去到深水埗向露宿者派飯派湯同其他物資。途中見證露宿者爭先恐後為一個飯盒，仲見到有人使用針筒💉，同埋有人似乎係在帳篷內已經離世，眼前嘅景象令各位大小義工都覺得好震撼，活動過後心情都有點複雜和沉重。
幾位小義工唔怕辛苦，無懼環境惡劣，為露宿者帶來溫暖的一餐，值得一讚👏🏻👏🏻

* 「許善」安排中學生義工探訪活動第3️⃣回*

2024.4

話咁快嚟到第三個星期探訪活動👏，同學仔探訪及同獨居長者打開話題的技巧愈見成熟👍，赤子之心加上經驗累積令到整個過程更加順利完成💞。之後「許善」將會帶同學仔跳出框框，參加其他類型的探訪活動。

* 「許善」安排南區中學生義工探訪活動第2️⃣回 *

2024.4

連續第二個星期同學仔又出發探訪獨居長者🚶‍♀️🚶。今次同學仔遇到一位十分天真開朗的許婆婆，同同學仔談天說地，證明孤單但不孤獨👍。另外一位關婆婆由於唔識字，同學仔怕婆婆攪錯物品用途，就直接係物品畫上唔同圖案🎨🖌️，等婆婆一睇到就知道果件物品係用係邊個部位，同學仔真係聰穎又細心💖

* 「我要做導師」計劃 - 麵粉公仔班🐼🐰 *

2024.4

「許善」創會方針之一就係要傳承非物質文化遺產，除咗對外透過學校及團體進行工作坊，對內亦會為義工舉辦「我要做導師」精修課程👩‍🏫。最近一次適逢復活節假期🥚🐇的星期五，「許善」邀請咗一眾義工學習製作麵粉公仔，今次仲有唔少小義工趁假期一齊參與添。

導師當日教咗三款麵粉公仔，當中兩款簡單嘅，再加一款複雜小小嘅座枱公仔。由於係小班教學，導師親身指導各位參加者💪，深入淺出，讓大家可以了解當中的技巧🙌，等大家學識之後第日可以教小學生/幼稚園學生做。💕

* 懲教署體育會第68屆秋季賣物會支票致贈典禮🎁 *

2024.3

大家記唔記得「許善」上年年尾贊助咗懲教署秋季賣物會2023？早前於三月十五日在懲教處於中央圖書館舉行了支票致贈典禮，本會由名譽顧問鄧秉明先生代表出席。是次活動受惠機構包括香港錫克教廟及The Stanley Mosque。本會略盡綿力，希望社會不同界別的人士都可以受惠🫶。最後亦感謝懲教署的安排。

* 「許善」生日助人計劃🎂 2024年4月生日之星✨ *

2024.4

「許善」生日助人計劃🎂 2024年4月生日之星✨

感謝以下12位4月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐SY Kwok ⭐Bonnie Lo ⭐Louis Yan ⭐Johnny Wong
⭐Susan Chu ⭐Jason Chan ⭐Sabrina Chui
⭐Arnold Leung ⭐Olivia Hui ⭐Anderson Chan
⭐Scarlett Mak ⭐Eunice Leung

* 「許善」安排南區中學生義工探訪活動 *

2024.3

好多中學都有做慈善project 鼓勵學生多行善❤️。今次幾位中學生就決定做「許善」義工，喺未來幾個禮拜參與「許善」嘅活動。第1️⃣炮探訪獨居長者已經於3月30日完成，當日送電器同福袋之餘亦同佢哋傾偈㖭。💕

今日探訪嘅其中一位老友記嘅屋企地方真係非常淺窄，只夠兩個人入到去企喺度，感覺極為震撼😱。

另一邊廂有位婆婆，雖然喺資源極度缺乏嘅環境底下生活，但係依然活得快樂💖，仲教我哋做運動㖭！👯‍♂️

呢班中學生去完今次探訪都話一定要繼續努力💪，幫助更加多社會上冇佢哋咁幸福嘅人。🫰

* 「我要做導師」計劃 - 中國書法班✏️ *

2024.3

「許善」義工之中好多臥虎🐯藏龍🐉，當中新任幹事嘅輝哥就係熱衷中國書法的一份子😎，他每年都會親手寫幾百張新年揮春赠送予長者及給「許善」連埋福袋送出💕有需要人士。而「我要做導師」計劃為培訓更多非遺導師，就邀請咗輝哥開班授徒，將佢對中國書法嘅知識、技術及心得傳授，今次幸得義工Susan借出地方作工作坊讓有興趣的義工更方便參與。雖然目前這些參與義工還在學習階段，未可以好似輝哥咁嫻熟書寫，但係已經獲益良多，只要多加練習，好快大家都可以成為導師之一。這班義工都懷着熱情嘅學習精神，努力接受培訓，為宣揚非遺的使命不遺餘力！感謝輝哥無償及無私的傾囊相授🫰及各位義工的參與👍

* 滬江維多利亞學校Fun Day🎉❤️ *

2024.3

「許善」有幸🙏獲滬江維多利亞學校邀請主辦學校Fun Day其中三個攤位，包括龍鬚糖(非遺小小問題考考你)及中國剪紙✂️及麪粉公仔製作，讓「許善」可以宣揚中國非遺項目俾我地未來社會主人翁📢。當日共有30多位義工參與，最早的一組由8am已經要到學校Setup，最後一組收埋檔都差不多6pm了。整日兩個攤位都十分受歡迎👏，簡直係做到唔停手🙌，特別頂住大風🌬️係做戶外崗位嗰啲義工，真係辛苦大家了🙇🙇‍♀️。今次活動更有第一次有外藉朋友參與作為義工，證明慈善係不分國界的。🗺️

* 生日之星Elijah Lu小朋友🌟 探訪真光護老之家❤️ *

2024.3

二月尾舉行中華文化慈善生日會🎂的Elijah Lu小朋友, 喺三月第一個星期日連同屋企人同親友，喺「許善」的安排下，去咗探訪聖雅各福群會真光護老之家。當日Elijah Lu小朋友一家人除咗將喺早前生日會包嘅愛心福袋💕送到各位長者手上🙌，仲同各院友及職員親身交流💬，學習及體驗關愛精神💌。感謝Elijah小朋友一家人願意選擇以一個慈善的方式為小朋友慶生🙏，等小朋友可以有一個難忘又有意義的生日。🫶

最後亦感謝聖雅各福群會的安排🙏

* 「許善」老少幼同樂日@世界龍岡黃耀南小學精華短片 *

2024.2

當日活動表演十分精彩🤩，觀眾反應熱烈🔥，大小朋友都踴躍參與👐，台上台下互動融為一體🫶，大家一齊透過短片感受下當日的氣氛啦🎞️! 感謝所有當日出席及協助籌備活動嘅義工嘅付出和努力🙏，令到活動圓滿舉行。同時亦感謝校方邀請及聖雅各福群會蘇屋長者鄰舍中心帶埋一眾老友記參與🙏

* 「許善」生日助人計劃🎂 2024年3月生日之星✨ *

2024.3

感謝以下10位3月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐Thompson Chen ⭐Diana Yau ⭐Adam To
⭐Cora Wong ⭐Grace Yeung ⭐Desmond Chow
⭐Stephanie Ng ⭐KK Leung ⭐Ethan Leung ⭐Shirley Fu

* 雞蛋仔工作坊🥚@中華基督教會屯門堂何福堂幼稚園 *

2024.2

又回熟悉的環境😌，感謝校方第五年邀請「許善」到貴校進行非遺工作坊🙏。今年嘅項目繼續都係雞蛋仔工作坊🥚，因為簡單易做又好味😋，最適合幼兒小班教學。雖然對住小朋友，但係義工們都係一絲不苟準備有圖片的Notes作分享🧐。篩麵粉，攪拌材料都難唔到同學仔👍，轉過頭就有新鮮熱辣♨️的雞蛋仔出爐喇，仲可以即時享用添!

最後當然都要感謝義工們的協助及充滿愛心的教導🫶

* 「許善」老少幼同樂日@世界龍岡黃耀南小學 *

2024.2

喺今個月初，「許善」有幸同世界龍岡黃耀南小學合作🤝，係過農歷新年前合辦咗一個老少幼同樂日🎊。當日有幼稚園、黃耀南小學嘅同學仔之外，仲特別邀請咗一班老友記參與🫶。活動中「許善」安排咗多個非物質文化表演，包括扯鈴、中國雜耍、粵曲及變臉表演。同學仔睇到各個表演者的神乎其技，不僅發出驚訝嘅嘩嘩聲😮😱，之後仲十分踴躍上台體驗🤩。雖然老友記比較淡定，但係聽到粵曲表演🎶🎤可以見到佢地都係十分陶醉💕。表演之後「許善」仲有新春福袋🎁派比老友記，順便拜個早年之餘🧧，讓佢地可以滿載而歸。當日除咗喺禮堂有表演，同時喺學校活動室亦有雞蛋仔和剪紙工作坊進行，實行有得睇，有得玩，又有得食，讓大家享受一個有意義的上午。

感謝學校的邀請及提供場地🙏，亦感謝義工們一大早就要幫忙Setup埸地及協助活動順利進行。🙏

* 中華文化慈善生日會🎂- Elijah Lu 小朋友5歲生日 *

2024.2

「許善」鼓勵小朋友從小養成關愛精神❤️，生日唔好只顧自己開心慶祝，反而趁嚟個機會做善事，同其他人分享快樂。

同時「許善」亦希望透過舉辦非遺生日會🎂宣揚中國非物質文化遺產🐉；讓未來社會未來主人翁更加了解各種非遺项目。

另外，有些家長更會呼籲參加Party嘅小朋友捐款給「許善」代替送生日禮物，實行生日助人🫶。

當天「許善」義工團及一眾導師一早🕖就到活動場地Set Up。今次活動項目包括雞蛋仔製作🐥🥚、麵粉公仔、糖畫、龍鬚糖、中國結、福袋包裝體驗及變臉表演，義工們帶領住一班參加派對的大小朋友一齊透過玩樂了解中國香港非遺文化。

生日嘅小朋友Elijah同佢屋企人稍後更會把當日小朋友親手包嘅福袋親自送到基層老人家手上。送上嘅當然唔只係一個福袋，而係一份溫暖同愛心❤️

藉此機會再次感謝善長選擇「許善」為小朋友舉行生日派對🙏及善長今次嘅捐款；當然亦要再次多謝咁多位義工為慈善出一分力。😘

* 「許善」尾牙午宴2024🍽️ *

2024.2

為感謝義工們過去一年的支持及愛❤️與汗💦，本會於1月27日宴請了一眾義工進行午宴🍽️。今年活動數量破記錄新高📈，全賴義工們的熱情參與🔥，而且亦感染身邊的朋友加入成為「許善」義工一份子🆕，好開心今年午宴見到好多新面孔👀。午宴喺「許善」管理層由歡迎致詞開始，今年更邀請咗兩位長期支持「許善」的義工成為新任幹事，恭喜吳騰輝先生 (Ernesto)及廖燕恩女士 (Elizabeth)🎉。多名義工過去一年亦獲得由民政及青年事務局與義務工作發展局合辦「香港義工獎」2023 嘉許🥳，亦有多位義工完成本會「我要做導師」計劃並榮升為導師🎓，兩個獎項同時於午宴中頒發📜。除咗享用美食😋，「許善」管理層亦準備咗抽獎及新春福物送比大家，包括有「許善」利是封🧧、手寫揮春、手寫福字及收納袋🛍️，等大家又可以又食又拎😆。「許善」再次衷心感謝大家的支持🫶，未來發展仍需要與大家同行，2024年讓我們一起繼續努力💪，令更多有需要的人受惠！另特別聲明，所有宴會費用及紀念品均由管理層自掏荷包支付以答謝大家；並沒有用善款分毫👍🏻

* 「許善」慈善宴第三回🍽️ *

2024.1

嚟到２０２４年，美味又再次回歸😋。「許善」創辦人之一，人稱「隱世廚神」的許師傅🏅繼續親身下廚，為善長Jason Chan 及他的好友炮製傳統與創意俱備的佳餚🍛，看相就知許師傅如何認真🧐。新鮮的材料配上高超的烹調技術，賓客們都讚不絕口😍。當日籌得善款HK$20,000。

感謝「許師傅」及善長們的支持。🙏🙏

* 「許善」探訪活動🎁 *

2024.2

年近歲晚🐉，「許善」當然唔會忘記社會上有需要的人士，早2個星期六(2月3日)再次兵分兩路上門探訪，仲去完九龍區再入新界區添💪。每次探訪都會同受訪者傾計💬，今次就遇到一位好開朗的獨居婆婆👵🏻，同義工們分享唱K心得🎤🎶，逗得一眾義工開心大笑🤣。傾談過後就送上由聖雅各事先準備的小家電及「許善」新春福袋🧧，今次福袋內容包括揮春、紙巾、壽桃牌麵、嘉頓餅乾、黃道益活絡油活絡貼及另外有4款不同日用品或零食。義工仲會教導受訪者點用新家電甚至幫忙安排添，今次其中一樣就係幫一位聽障人士安裝閃燈門鐘🚨🔔。

感謝聖雅各的安排及義工們的協助。🙏

* 我最喜愛非遺項目大賽得獎作品欣賞👀 *

2024.2

今次大賽得獎作品水平好高，主題包括：涼茶、舞獅、粵劇、變臉、麵粉公仔、中秋節、春節、圍棋、糯米、月餅製作、太平清醮、客家話及酒釀製技藝，大家一齊嚟欣賞啦!😍i

* 「許善」生日助人計劃🎂 2024年2月生日之星✨ *

2024.2

「許善」生日助人計劃🎂 2024年2月生日之星✨ 感謝以下13位2月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐Christina Kam ⭐Phoebe Wong ⭐James Mak ⭐Helen Yim⭐Elseda Shum ⭐Ronald Kwan ⭐Ivan Ma ⭐Helen Ha ⭐Reyna Chu ⭐Tam Ping Cheung ⭐KH Wong ⭐Nelson Yeung ⭐Agnes Hui

* 「許善」我最喜愛非遺項目大賽頒獎禮🏅✨ *

2024.1

歷時超過一年的「我最喜愛非遺項目大賽」終於劃上圓滿的句點⭕，頒獎禮亦於上星期六(27日)舉行。恭喜各位得獎同學可以係芸芸過千份參賽作品中脫穎而出獲得大會評審及公眾的青睞🥳，絕對係實至名歸👍。「許善」亦感謝所以有份投稿的同學及全力支持學校🙏，讓「我最喜愛非遺項目大賽」得以成功。

以下為完整得獎名單📋：

🟡初小組
冠軍：黃煒傑；題目：中國象棋；拔萃男書院附屬小學
亞軍：陳淳醴；題目：涼茶；拔萃男書院附屬小學
季軍：尹顥霖；題目：圍村黃酒釀；保良局香港道教聯合會圓玄小學

🔵高小組
冠軍：孫煒承；題目：中秋節；伊利沙伯中學舊生會小學分校
亞軍：張沚綸；題目：麵粉公仔；伊利沙伯中學舊生會小學分校
季軍：李琛柔；題目：醒獅；伊利沙伯中學舊生會小學分校

🟢公開組
冠軍：姚珈瑜；題目：客家話
亞軍：梁瀜允；題目：太平清醮
季軍：李芷晴；題目：月餅製作

🟣最踴躍參加學校
初小組：保良局香港道教聯合會圓玄小學 — 佔所有「初小組」30%
高小組：伊利沙伯舊生會小學分校 — 佔所有初小組「高小組」51%

🔴網上人氣大獎（初小組）
第一名：陳淳醴；題目：涼茶；拔萃男書院附屬小學
第二名：Leung Hoi Tik；題目：變臉；拔萃男書院附屬小學
第三名：江凱倫；題目：粵劇；基督教香港信義會信愛學校

🔴網上人氣大獎（高小組）
第一名：王梓熔；題目：圍棋；伊利沙伯中學舊生會小學分校
第二名：余柏謙；題目：春節；伊利沙伯中學舊生會小學分校
第三名：危紫琪；題目：涼茶；伊利沙伯中學舊生會小學分校

🔴網上人氣大獎（公開組）
第一名：姚珈瑜；題目：客家話
第二名：梁瀜允；題目：太平清醮
第三名：李芷晴；題目：月餅製作

* 「許善」新春福袋包裝日🧧 *

2024.1

每年春節「許善」義工團都會聚首一堂包裝福袋。今次30位義工齊集、總共要包800個新春福袋。新春福袋內容十分豐富😍，包括有黃道益活絡油、紙巾、餅乾、零食、牙膏牙刷，仲有新春限定「許善」利是封🧧，義工們親手寫揮春共800張、另外仲有由於重量關係已經直接送咗去合作機構嘅白米🍚、洗頭水及梘粉，簡直係包羅萬有💯。義工們抱住將「善」送出嘅正能量❤️又再一次極速完成包裝任務，真係要同義工們講句：「有你們真好🫰🫶💕」

最後亦要感謝以下機構(不分先後)捐出物資，讓公公婆婆可以過一個豐盛的新年。🙏

🩷 聚大行 🩷 士多Ztore 🩷 壽桃牌
🩷 VIRJOY 🩷 嘉頓Garden 🩷 健盈醫藥
🩷 David Chan

及以下義工親手寫揮春
💛 Shirley Fu 💛 Ernesto Ng 💛 Polly Shum
💛 Anson Tam 💛 Alan Tong

* 香港潮商學校🏫 變臉表演及分享會🎭 *

2024.1

好開心又返到嚟香港潮商學校，今次為同學帶嚟中國🇨🇳非遺文化 - 川劇變臉表演及分享會。「香港國寶級變臉大師」氣勢磅礡登場💃，仲近距離表演變臉，同學驚訝的表情表露無遺😱😍，紛紛變成小Fans上前爭住要同大師握手🤝🏻，喺其後上台體驗環節個個同學都搶住舉手參與，有幸被選中嘅同學喺大師簡單教導基本功下都做得有板有眼。👍

感謝校方的邀請及「許善」義工們的支持。🙏

* 北角派發福飯🍚及福米🌾 *

2024.1

剛剛星期六（13日）一早「許善」義工團就出動去北角派發福飯🍚及福米🌾。去到現場已經有老友記未夠鐘就排隊，義工們就拿拿聲入飯盒同搬米💨，等活動可以準時開始⏱️。「許善」啲義工真係好有愛💕，除咗出力💪，周時仲會有心思主動準備額外的禮物，今次就有襯就快新年親手寫嘅100張揮春及對抗流感高峰期嘅酒精搓手液，借此活動「許善」亦為公公婆婆送上新年禮物同祝福🧧🫶。

感謝Ztore贊助福米🙏

* 上水鳳溪第一小學校園工作坊🏫 *

2024.1

又回到熟悉的上水鳳溪第一小學，2024年已經喺第4️⃣年頭同學校合作，今次再為同學仔帶來雞蛋仔🥚及中國剪紙工作坊✂️。今次係第一次百幾個同學仔一齊喺禮堂做剪紙👏，好彩義工導師Susanna 領導有方，一班義工亦非常專業，令整個過程非常順利。雞蛋仔工作坊義工導師Isabella 技術亦愈來愈精進💯，可以輕鬆教導之餘，仲同同學仔不斷互動。校方最後將當日剪紙工作坊的作品喺走廊做咗一道「剪紙牆」以供參觀㖭😍。

感謝校方再次邀請及義工們的協助🙏

* 「許善」生日助人計劃🎂 2024年1月生日之星✨ *

2024.1

感謝以下14位1月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐Simon Jim ⭐Brenda Chark ⭐Ho Yee Lin
⭐Raymond Kung ⭐Gilbert Wong ⭐Anthony Kwok
⭐Mabel Leung ⭐Wendy Tsang ⭐Joshua Siu
⭐Natasha Lee ⭐Sophia Yim ⭐Kimberley Cheung
⭐Sheldon Cheung ⭐Jane Young